لاہور (وقائع نگارخصوصی )امیر جماعت اسلامی پنجاب وسطی محمد جاوید قصوری نے کہا کہ ملک بھر میں مہنگائی کی شرح 44.49سے تجاوز کر چکی ہے، ہر چیز کی قیمت آسمان سے باتیں کر رہی ہے۔ عوام زندہ درگور ہو گئے ہیں،کوئی پرسان حال نہیں۔ان خیالات کا اظہار انہوں نے گزشتہ روز مختلف تقریبات سے خطاب کرتے ہوئے کیا۔ انہوں نے کہا کہ آٹھ ماہ کے دورا ن گردشی قرضوں میں 419ارب روپے کا اضافہ ہوا ہے، رواں سال کے آغاز میں قرضہ 2,253ٹریلین روپے تھا جو اب 2,67ٹریلین سے بڑھ چکا ہے۔ آئی ایم ایف کی سخت ترین شرائط پر عمل درآمد کرتے ہوئے حکمران 22کروڑ عوام کی زندگی اجیرن بنا رہے ہیں۔ مافیا نے پورے ملک کو اپنی گرفت میں لے رکھا ہے۔ عوام پہلے ہی مہنگائی کی چکی میں پس کر رہ گئے ہیں۔ کسانوں اور برآمدی شعبوں کے لیے سبسڈی ختم کرنے سے جہاں ایک طرف غریب کاشتکار وں کی کمر ٹوٹ جائے گی وہاں دوسری جانب انڈسٹریز بھی تباہ ہو جائے گی۔حکمران ہوش کے ناخن لیں اور ایسی پالیسیاں مرتب نہ کریں جن سے عوامی مشکلات میں اضافہ ہوتا ہو۔ عوام کے آمدن کے ذرایعے مخدوش اور اخراجات کا گراف آسمان سے باتیں کر رہا ہے۔انہوں نے کہا کہ پی ٹی آئی اور پی ڈی ایم کی ناکام حکومتوں کی بدولت غربت کی عالمی درجہ بندی میں پاکستان 116ممالک کی فہرست میں اس وقت 92ویں نمبر پر ہے۔کرپٹ اور نا اہلوں کا ٹولہ ہے جو بر سر اقتدار آگیا ہے،ان ظالم حکمرانوں سے نجات حاصل کرنا ہو گی۔عوام عملا بدحال ہو چکے ہیں۔انہوں نے کہا کہ اداروں کو آپس میں ٹکراؤ، ملکی سلامتی کے لیے انتہائی خطرناک ہے۔ملک سیاسی و آئینی بحران کے دہانے پر پہنچ چکا ہے۔تمام اداروں کو آئینی ذمہ داری ادا کرنا ہو گی۔حالات کو افہام و تفہیم کے ساتھ قابو کرنے کی ضرورت ہے۔
