لاہور (نمائندہ جسارت) لاہور ہائیکورٹ نے پی ٹی آئی رہنما چودھری پرویز الٰہی کو اینٹی کرپشن کے مقدمے سے ڈسچارج کرنے کے خلاف پراسیکیوشن کی درخواست پر فیصلہ سنا دیا۔ عدالت نے ٹرائل کورٹ کو دوبارہ سے معاملہ دیکھنے کی ہدایت کردی۔ جسٹس سلطان تنویر احمد نے پراسیکیوشن کی درخواست پر سماعت کی۔ اپیل میں موقف اختیار کیا گیا کہ جوڈیشل مجسٹریٹ نے پرویز الٰہی کو قانون کے برعکس ڈسچارج کیا۔ عدالت نے اینٹی کرپشن کے 3 مقدمات میں پرویز الٰہی کو
ڈسچارج کیا۔ اپیل میں استدعا کی گئی کہ عدالت جوڈیشل مجسٹریٹ کا فیصلہ کالعدم قرار دے۔ عدالت نے مختصر فیصلہ سناتے ہوئے ٹرائل کورٹ کو دوبارہ معاملے کو دیکھنے کی ہدایت کردی اور پراسیکیوشن کی درخواست نمٹا دی۔
