اسلام آباد(مانیٹرنگ ڈیسک/صباح نیوز/آن لائن)آرمی چیف جنرل عاصم منیر نے کہا ہے کہ ریاست کی رٹ قائم کرنے کے لیے کسی بھی حد تک جائیں گے‘ ایک پاکستانی شہری کی جان و مال اور فلاح و بہبود کسی بھی دوسرے ملک اور کسی بھی دنیوی مفاد سے مقدم ہے۔قومی ایپکس کمیٹی نے پاکستان میں غیرقانونی طور پر مقیم تمام غیر ملکیوں کو ملک بدر کرنے کا حتمی فیصلہ کر لیا۔ نگراں وزیراعظم انوار الحق کاکڑ کی زیر صدارت قومی ایپکس کمیٹی کا اجلاس ہوا، جس میں سول اور عسکری حکام ، حساس اداروں کے سربراہان، چاروں صوبائی آئی جیز اور چیف سیکرٹریز نے شرکت کی۔ اجلاس میں ملک کی مجموعی امن و امان کی صورتحال کا جائزہ لیا گیا۔ ذرائع کے مطابق آرمی چیف نے اجلاس میں زور دے کر کہا ایک پاکستانی شہری کی جان و مال اور فلاح و بہبود کسی بھی دوسرے ملک اور کسی بھی دنیوی مفاد سے مقدم ہے۔آرمی چیف نے کہا کہ پاکستان کے پاس صرف ایک ہی آپشن ہے کہ ہمیں اٹھنا ہوگا اور ان درپیش چیلنجز کا مقابلہ کرنا ہوگا، ریاست کی رٹ قائم کرنے کے لیے کسی بھی حد تک جائیں گے۔ قومی ایپکس کمیٹی کے اجلاس سے قبل آرمی چیف جنرل عاصم منیر نے وزیر اعظم سے ملاقات کی، نگراں وزیر اعظم انوار الحق نے آرمی چیف کا وزیر اعظم ہائوس میں استقبال کیا، ملاقات میں قومی و داخلی سلامتی کے امور پر تفصیلی تبادلہ خیال کیا گیا‘ دونوں رہنمائوں نے دہشت گردی کے حالیہ واقعات کی شدید مذمت کی، ملاقات میں ملک بھر میں دہشت گردوں کے خلاف اینٹلی جنس بیسڈ آپریشنز کو وسعت دینے پر اتفاق کیا گیا۔