اسلام آباد (اے پی پی+ مانیٹرنگ ڈیسک) الیکشن کمیشن نے عالمی مبصرین کے ضابطہ اخلاق کی منظوری دے دی۔ الیکشن کمیشن کا اجلاس چیف الیکشن کمشنر سکندر سلطان راجا کی سربراہی میں ہوا، اجلاس میں ارکان الیکشن کمیشن کے علاوہ سیکرٹری الیکشن کمیشن اور دیگر سینئر افسروں نے بھی شرکت کی، الیکشن کمیشن نے وزرات داخلہ و خارجہ اور دیگر اداروں سے خصوصی نمائندے مقرر کرنے کی ہدایت کر دی۔ چیف الیکشن کمشنر نے اجلاس میں عالمی مبصرین کے ضابطہ اخلاق کی بھی منظوری دیتے ہوئے عالمی مبصرین کے معاملے پر الیکشن کمیشن کا اہم اجلاس 16 اکتوبر کو طلب کر لیا، خواہش مند عالمی مبصرین کے کیسز کو فوری طور پر پراسس کرنے کا بھی حکم دیا گیا۔ الیکشن کمیشن نے عام انتخابات کے لیے انتظامات پر اطمینان کا اظہار کیا، چیف الیکشن کمشنر نے کہا ہے کہ الیکشن سے متعلق تمام امور شیڈول کے مطابق مکمل کیے جائیں۔
