کراچی (اسٹاف رپورٹر) پولیس نے شہر میں بھتا خوری کی واراداتیں بڑھنے کا اعتراف کرلیا، ایس ایس پی اسپیشلائزڈ انویسٹی گیشن یونٹ جنید شیخ نے کہا ہے کہ کراچی میں حالیہ دنوں میں بھتاخوری کا سلسلہ بڑھا ہے بھتا خوری کا نیٹ ورک دبئی اور ایران سے چلایا جارہاہے۔ انہوں نے مزید کہا کہ ریئل اسٹیٹ میں کام کرنے والے شخص کو بھتے کی کال دبئی سے موصول ہوئی، جس کو ٹریس کیا گیا۔ ایس ایس پی نے یہ بھی کہا کہ دبئی اور ایران سے یہ لوگ پاکستان میں آپریٹ کرتے تھے، واردات میں ملوث 2 ملزمان کو گرفتار کرلیا گیا ہے۔ جنید شیخ کا کہنا تھا کہ دونوں ملزمان بلڈر تھے اور بھتا بھی وصول کرتے تھے، دیگر ملزمان کی گرفتاریوں کے لیے چھاپے مارے جارہے ہیں۔
