کراچی(سید وزیر علی قادری):آئی سی سی ورلڈ کپ 2023 سے قبل دنیا کی مختلف ٹیموں کے کئی اسٹار کرکٹرز کے فٹنس مسائل سامنے آنا شروع ہوگئے ہیں پاکستان کے نسیم شاہ، بھارت کے اکشر پٹیل، آسٹریلیا کے ٹریوس ہیڈ تک ورلڈ کپ اسکواڈ میں شامل زخمی کھلاڑیوں کی فہرست طویل ہوتی جارہی ہے پاکستان کرکٹ ٹیم کے اسٹار فاسٹ بولرز نسیم شاہ اور حارث رئوف ایشیا کپ کے سپر 4 مرحلے میں بھارت کے خلاف میچ کے دوران انجری کا شکار ہوگئے تھے، پی سی بی کی حالیہ رپورٹس کے مطابق 20 سالہ نوجوان فاسٹ بولر نسیم شاہ کی ورلڈ کپ میں شرکت مشکوک ہوگئی ہے جبکہ حارث رئوف ایشیا کپ میں بھارت کے خلاف صرف 5 اوورز ہی کرا پائے تھے کہ انجری کا شکار ہوگئے تاہم امید ہے کہ حارث رئوف ورلڈ کپ سے قبل اپنی انجری سے مکمل طور پر چھٹکارا پالیں گے۔ آسٹریلیا کے اوپننگ بلے باز ٹریوس ہیڈ کا جنوبی افریقا کے خلاف سیریز کے دوران بائیاں بازو فریکچر ہوگیا تھا ان کے ان فٹ ہونے سے 5 مرتبہ کی ورلڈ چیمپئن آسٹریلیا کو نقصان ہوگا۔ بھارتی کرکٹرز اکشر پٹیل اور شریاس ایئر کو ایشیا کپ کے دوران انجری کا سامنا کرنا پڑا، ٹیم انتظامیہ کے مطابق اکشر پٹیل ورلڈ کپ سے قبل اپنیفٹنس مسائل پر قابو پا سکتے ہیں۔ شریاس ایئر ایشیا کپ کے 2 میچوں میں حصہ لینے کے بعد کمر میں تکلیف کا شکار ہوگئے تھے جس کی وجہ سے وہ ٹورنامنٹ کے باقی میچوں میں حصہ نہیں لے سکے۔ سری لنکا ٹیم کے اسپنر مہیش تھیکشانا ایشیا کپ میں بھارت کے خلاف سپر 4 مرحلے کے میچ کے دوران ہیمسٹرنگ انجری کا شکار ہونے کے باعث ایشیا کپ سے باہر ہوگئے جبکہ ان کی ورلڈ کپ میں شرکت بھی مشکوک ہے۔ سری لنکا کے سٹار آل رائونڈر ونیندو ہسارنگا لنکا پریمیئر لیگ کے دوران ٹانگ میں کھچائو کے باعث پورے ایشیا کپ سے باہر رہے تاہم وہ ورلڈ کپ میں واپسی کے لئے پرامید ہیں۔ سری لنکا کے ہی فاسٹ بولر دشمانتھا چمیرا بھی لنکا پریمیئر لیگ میں کندھے کی تکلیف کے باعث ایشیا کپ میں شرکت نہیں کر سکے تھے اور ان کی ورلڈ کپ میں بھی شمولیت غیر یقینی ہے جس سے سری لنکا کو فاسٹ بولنگ میں مشکلات کا سامنا کرنا پڑ سکتا ہے۔