اسلام آباد (مانیٹرنگ ڈیسک) عمران خان نے وفاقی بجٹ کو عوام اور کاروبار دشمن قرار دے دیا۔ تفصیلات کے مطابق سابق وزیر اعظم اور تحریک انصاف کے چیئرمین عمران خان کی جانب سے وفاقی حکومت کے آئندہ مالی سال کے بجٹ پر ردعمل دیا گیا ہے۔سماجی رابطوں کی ویب سائٹ ٹوئٹر پر کی گئی ٹوئٹس میں سابق وزیر اعظم نے بجٹ کو عوام دشمن قرار دیتے ہوئے
مسترد کر دیا اور کہا کہ امپورٹڈ حکومت کے عوام اور کاروبار دشمن بجٹ کو مسترد کرتے ہیں، بجٹ افراط زر اور اقتصادی ترقی کے غیر حقیقی مفروضوں پر مبنی ہے، حساس قیمتوں کا انڈیکس آج 24 فیصد تک جا پہنچا ہے۔سابق وزیراعظم نے اپنے ٹوئٹ میں مزید کہا ہے کہ اعداد وشمار سے واضح ہے کہ مہنگائی کی شرح 25 سے 30 فیصد ہوگی اور یہ مہنگائی عام آدمی کو تباہ کردے گی جب کہ شرح سود بلند ہونے سے معاشی ترقی رک جائے گی۔انہوں نے اپنی ایک اور ٹوئٹ میں کہا کہ ہمارے دور میں کی گئیں انقلابی ٹیکس اصلاحات روکی جارہی ہیں، صحت کارڈ اور کامیاب پاکستان جیسے غریب دوست اقدامات ختم کیے جارہے ہیں۔سابق وزیراعظم نے کہا کہ پرانا پاکستان کا غیر تصوراتی بجٹ قوم کو مزید بوجھ اور مشکلات میں ڈالے گا۔