بیجنگ(انٹرنیشنل ڈیسک) چین کی جوہری آبدوز کھلے سمندر میں حادثے کا شکار ہوگئی جس کے نتیجے میں 55 افراد ہلاک ہوگئے ۔ مرنے والوں میں کپتان اور نیوی کے 21 افسران بھی شامل ہیں۔ برطانوی اخبار دی ٹائمز نے انٹیلی جنس کا حوالہ دیتے ہوئے دعویٰ کیا کہ شنگھائی کے شمال میں شانڈونگ صوبے کے قریب آبدوز میں آکسیجن ختم ہو گئی تھی ۔ آب دوز اپنی ہی فوج کے نصب کردہ چین اور لنگر سے ٹکرا کر سمندرکی تہ میں بیٹھ گئی تھی۔ سمندری فرش ایک جال کی طرح ہوتا ہے جس میں دشمن ممالک کے جہازوں کو پھانسا جاتا ہے ۔ رپورٹ کے مطابق چین نے یہ جال امریکا اور برطانیہ کے جہازوں کو پکڑنے کے لیے بچھایا تھا لیکن خود پھنس گیا۔ برطانوی انٹیلی جنس نے دعویٰ کیا ہے کہ آبدوز کے اپنے ہی ملک کے بچھائے جال میں پھنسنے سے اس کے سسٹم میں خرابی پیدا ہوئی جس سے آکسیجن ختم ہوگئی اور عملے کے تمام ارکان کا دم گھٹ گیا ۔ انٹیلی جنس رپورٹ نے تباہ ہونے والی آبدوز کی شناخت 093-417 کے طور پر کی تاہم تائیوان کی طرح چین نے آبدوز کے تباہ ہونے کی تردید کی ہے۔یاد رہے کہ چین کے پاس 553 ایم ایم ٹارپیڈو سے لیس ٹائپ093 کی حملہ آور 6 آبدوزیں ہیں۔
