کراچی (اسٹاف رپورٹر )ڈی آئی جی ایسٹ اظفر میہسر نے دعویٰ کیا ہے کہ کراچی کے علاقے گلستان جوہر میں قتل ہونے والے ممتاز عالم دین مفتی ضیا الرحمن کو ڈکیتی مزاحمت پر قتل کیا گیا تھا۔اظفر میہسر نے پریس کانفرنس کرتے ہوئے کہا کہ گلستان جوہر میں ممتاز عالم دین مفتی ضیا الرحمن کے قتل میں ملوث4 ملزمان کو گرفتار کرلیا ہے۔انہوں نے کہا کہ گرفتار ملزمان میں گل شیر، حق نواز گوپانگ، عمیر اور یاسین شامل ہیں جو کہ اسٹریٹ کرمنل اور عادی مجرم ہیں۔اظفر میہسر نے دعویٰ کیا کہ مفتی ضیا الرحمن کے قتل کا واقعہ ڈکیتی کے دوران مزاحمت پر پیش آیا، ملزمان کو تکنیکی بنیادوں پر گرفتار کیا گیا جن سے واردات میں زیر استعمال اسلحہ بھی برآمد کیا گیا۔ڈی آئی جی ایسٹ نے کہاکہ گروہ کے ایک کارندے کا تعلق خیبر پختونخوا جبکہ دیگر کا پنجاب سے ہے، گروہ کے سرغنہ کی بھی نشاندہی کرلی اور واقعے کی ہر زاویے سے تحقیقات کر رہے ہیں۔اظفر میہسر نے کہا کہ مفتی ضیا کے قتل میں ملوث ملزمان کی گرفتاری کے لیے 100 سے زائد ملزمان کو شامل تفتیش اور 70 سے زائد مختلف مقامات پر چھاپے مارے گئے۔ڈی آئی جی ایسٹ غلام اظفر نے بتایا کہ انویسٹی گیشن ٹیم اور وفاقی حساس اداروں نے تمام شواہد اور ثبوتوں کا باریک بینی سے جائزہ لیتے ہوئے ملزمان کا سراغ لگا کر انہیں گرفتار کیا۔
