اسلام آباد(آن لائن) الیکشن کمیشن نے چودھری شجاعت حسین کو مسلم لیگ ق کا صدر قرار دیتے ہوئے سینٹرل ورکنگ کمیٹی کی کارروائی کو غیر قانونی قرار دے دیا۔مسلم لیگ ق کی صدارت سے ہٹانے کے معاملے پر الیکشن کمیشن نے چودھری شجاعت کی درخواست پر محفوظ فیصلہ سنا دیا جس میں قرار دیا گیا ہے کہ چودھری شجاعت حسین ہی مسلم لیگ ق کے صدر برقرار رہیں گے۔ الیکشن کمیشن نے چودھری شجاعت حسین کی برطرفی پارٹی آئین سے متصادم قرار دیتے ہوئے فیصلے میں کہا کہ سینٹرل ورکنگ کمیٹی کی کارروائی بھی غیر قانونی ہے۔ الیکشن کمیشن نے اپنے فیصلے میں
ق لیگ کی سینٹرل ورکنگ کمیٹی کا جاری کردہ پارٹی الیکشن شیڈول بھی کالعدم قرار دے دیا۔پارٹی صدارت سے ہٹائے جانے کے خلاف چودھری شجاعت نے الیکشن کمیشن کو درخواست دی تھی جس پر الیکشن کمیشن نے گزشتہ برس اگست میں فیصلہ محفوظ اور حکم امتناع پر چودھری شجاعت حسین کو بحال کیا تھا۔
