کراچی (اسٹاف رپورٹر)ایشین کرکٹ کونسل (اے سی سی) نے ایشیا کپ 2022 کے شیڈول کا اعلان کردیا، ٹورنامنٹ میں فائنل سے قبل پاکستان اور بھارت کے درمیان2 میچز ہونے کا امکان ہے۔ ایشیا کپ 2022 ٹی ٹوئنٹی فارمیٹ پر 27 اگست سے 11 ستمبر سری لنکا کی میزبانی میں متحدہ عرب امارات (یو اے ای) میں کھیلا جائے گا۔ایونٹ میں پاکستان اور بھارت کی ٹیمیں گروپ اے میں شامل ہیں جہاں تیسری کوالیفائر ٹیم انہیں جوائن کرے گی جبکہ گروپ بی میں سری لنکا، بنگلا دیش اور افغانستان شامل ہیں۔پہلے مرحلے میں سنگاپور، متحدہ عرب امارات (یو اے ای)، ہانگ کانگ اور کویت کوالیفائر ٹیم کے طور پر جگہ بنانے کے لیے آمنے سامنے ہوں گے۔شیڈول کے مطابق افتتاحی میچ 27 اگست کو سری لنکا اور افغانستان کے درمیان ہوگا جبکہ 28 اگست کو پاکستان اور بھارت کی ٹیمیں دبئی میں مدمقابل ہوں گی۔ 2 ستمبر کو پاکستان ٹیم کوالیفائر ٹیم سے مقابلہ کرے گی۔پہلے مرحلے کے بعد دونوں گروپس سے 2، 2 ٹیمیں سپر4 میں جگہ بنائیں گی جس میں ہر ٹیم 3 میچز کھیلے گی۔سپر 4 میں پاکستان اور بھارت کے درمیان مقابلہ 4 ستمبر کو متوقع ہے، ایونٹ کا فائنل 11 ستمبر کو کھیلا جائے گا۔
