لاہور(صباح نیوز) الیکشن کمشنر پنجاب نے شہباز گل کے الزامات کوبے بنیادقرار دیتے ہوئے کہا ہے کہ پولنگ کا عمل متنازع نہ بنایا جائے۔ صوبائی الیکشن کمشنر پنجاب نے شہباز گل کو جواب دیتے ہوئے کہا ہے کہ مظفر گڑھ میں پولنگ سٹیشن نمبر 44اور 46سے پولنگ ایجنٹ کو باہر نکالنے کا الزام غلط ہے، پی ٹی آئی رہنما شہباز گل کے الزامات بے بنیاد ہیں، خواتین پولنگ
سٹیشن پر خواتین اور مرد پولنگ سٹیشن پر مرد پولنگ ایجنٹ بیٹھتے ہیں۔الیکشن کمشنر پنجاب نے یہ بھی کہا ہے کہ سیاسی جماعت کے تصدیق شدہ پولنگ ایجنٹ کو بیٹھنے کی اجازت ہے، بغیر تصدیق کے الزامات لگا کر پولنگ کا عمل متنازع نہ بنایا جائے۔دوسری جانب متعلقہ ریٹرننگ آفیسر نے بتایا ہے کہ پولنگ سٹیشن نمبر 44 پر پی ٹی آئی کا پولنگ ایجنٹ امیر بخش موجود ہے جبکہ پولنگ سٹیشن نمبر 46پر پی ٹی آئی کا کوئی پولنگ ایجنٹ نہیں پہنچا ۔یاد رہے کہ پاکستان تحریکِ انصاف کے رہنما شہباز گل نے الزام عائد کیا ہے کہ مظفر گڑھ میں ہمارے امیدوار معظم جتوئی کے پولنگ ایجنٹس کو پولنگ سٹیشن نمبر 44 اور 46 سے باہر نکالا دیا گیا ۔پی ٹی آئی رہنما نے الزام لگایا ہے کہ معظم جتوئی کے پولنگ ایجنٹس کو خالی ڈبے اور بیلٹ پیپر چیک کرنے نہیں دیے گئے، دھاندلی کا آغاز کر دیا گیا۔
