اسلام آباد (صباح نیوز) وزیر اعظم آزاد حکومت ریاست جموں کشمیر سردار تنویر الیاس خان نے کہا ہے بھارت کا مقبوضہ کشمیر میںG20 کا اجلاس منعقد کرنا عالمی برادری کو دھوکا دینا ہے، یورپی یونین کے مقبوضہ کشمیر کے دورے کے بعد جی ٹونٹی اجلاس بھارت کا بھونڈا مذاق ہے۔ ان خیالات کا اظہار انہوںنے اپنے رد عمل میںکیا۔ سردار تنویر الیاس نے کہا کہجی20 ممالک بھارت کے مقبوضہ کشمیر میں اجلاس کو مسترد کردیں، مقبوضہ کشمیر عالمی سطح پر تسلیم شدہ متنازع علاقہ ہے، مسئلہ کشمیر کا حل اقوام متحدہ سلامتی کونسل کی قراردادوں کے مطابق ہونا ہے،5 اگست2019ء کے بعد مقبوضہ کشمیر فوجی چھائونی بنا ہوا ہے جہاں شہریوں کے بنیادی انسانی حقوق سلب ہیں اور آئے روز معصوم کشمیری بھارت کی قابض فورسز کے ہاتھوں شہید ہو رہے ہیں۔ وزیراعظم سردار تنویر الیاس نے کہا کہ عالمی برادری مقبوضہ جموں کشمیر میں بھارت کی ریاستی دہشت گردی کا نوٹس لے۔
