اسلام آباد( آن لائن ) صدر مملکت ڈاکٹر عارف علوی نے کہا ہے کہ جدید ٹیکنالوجی کے استعمال سے کرپشن اور بد انتظامی میں کمی لائی جاسکتی ہے، ٹیکس محتسب کے ادارے نے ٹیکس دہندگان کو بروقت اور فوری ریلیف کی فراہمی کے ذریعے انصاف کی راہ ہموار کی ہے۔اسلام آباد میں وفاقی ٹیکس محتسب کے زیر اہتمام ایک آگاہی سیمینار سے خطاب کرتے ہوئے صدر مملکت ڈاکٹر عارف علوی نے ٹیکس کلچر کو عام کرنے اور شکایات کے ازالے کے نظام کو مزید بہتربنانے کی ضرورت پر زور دیتے ہوئے کہا کہ شفاف نظام یقینی بنا کر ٹیکس نیٹ میں اضافہ کیا جاسکتا ہے۔انہوں نے مزید کہا کہ جدید ٹیکنالوجی اور ڈیجیٹلائزیشن سے نہ صرف شکایات کے ازالے کا عمل آسان ہوا بلکہ مستند ٹیکس ریکارڈ مرتب کرنے میں بھی مدد ملی ہے جدید ٹیکنالوجی کے استعمال سے کرپشن اور بد انتظامی میں کمی لائی جاسکتی ہے۔صدر مملکت نے کہا کہ بلاک چین ٹیکنالوجی کی مدد سے فنڈز کی کرپشن، انڈر انوائسنگ اور رشوت کو روکاجاسکتا ہے، جدید آئی ٹی نظام کے ذریئے ٹیکس گزاروں کو جلد ریلیف فراہم کیا جاسکتا ہے اور وفاقی ٹیکس محتسب کے ادارے پر عوام کا اعتبار بڑھ رہا ہے اور شکایت کنندگان کی شکایات کو کم سے کم وقت میں حل کیا جارہا ہے۔اس سے قبل وفاقی ٹیکس محتسب ڈاکٹر آصف محمود جاہ نے شرکا کو ادارے کی کارکردگی سے متعلق آگاہ کرتے ہوئے بتایاکہ ادارے کو امسال اب تک 25 سو شکایات موصول ہوئی ہیں جن میں سے 22 سو کو نمٹا دیا گیا ہے۔انہوں نے بتایا کہ ادارے کے فیصلوں پر عملدرآمد کو یقینی بنانے کے لیے اقدامات کیے جا رہے ہیں۔
