کراچیّ(نمائندہ جسارت)ملی یکجہتی کونسل سندھ کے صدر وسابق ایم این اے اسداللہ بھٹو نے ہندو انتہا پسند جماعت بی جے پی کی ترجمان کے پیغمبر اسلامؐ کی شان میں گستاخانہ بیان کی سخت مذمت کرتے ہوئے کہا ہے کہ بھارتی مصنوعات کا بائیکاٹ کیا جائے۔ انہوں نے ایک بیان میں کہا کہ بی جے پی رہنمائوںنے شان رسالتؐ میں گستاخانہ بیان دے کر امت مسلمہ کی دل آزاری کی ہے، جس کی جتنی بھی مذمت کی جائے کم ہے، کیوں کہ عقیدہ ختم نبوت اور تحفظ ناموس رسالت ہر مسلمان کے ایمان کا حصہ ہے، کوئی مسلمان چاہے کتنا ہی گنہگار کیوں نہ ہو وہ اپنا سر تو کٹواسکتا ہے مگر اپنے نبیؐ کی شان میں گستاخی برداشت نہیں کرسکتا۔ انہوں نے کہا کہ واقعے پر حکومت پاکستان کا خاموش تماشائی کردار افسوس ناک ہے جبکہ دیگر اسلامی ممالک نے بھارتی سفیر کو بلاکر اپنا احتجاج ریکارڈ کرایا ہے اور عوام ان کی مصنوعات کا بائیکاٹ کررہے ہیں اس لیے حکومت پاکستان امت مسلمہ کی ترجمانی کرتے ہوئے واقعے کا نوٹس لے اور بھارتی سفیر کو دفتر خارجہ بلاکر سخت احتجاج کیا جائے۔