اسلام آباد (آن لائن) وفاقی وزیر برائے ماحولیاتی تبدیلی سینیٹر شیری رحمان نے بی جے پی رہنماؤں کے توہین آمیز بیانات کی سخت ترین الفاظ میں مذمت کرتے ہوئے کہا ہے کہ ہمارے پیارے نبی ؐ کے بارے میں بی جے پی رہنمائوں کے چونکا دینے اور اشتعال انگیز بیانات کی شدید مذمت کرتے ہیں۔ اپنے بیان میں انہوں نے کہا کہ بی جے پی رہنمائوں نے مسلمانوں کی دل آزاری کی ہے،نا صرف بھارت بلکہ دنیا بھر کے مسلمانوں کے جذبات مجروح ہوئے ہیں۔ شیری رحمان نے کہا کہ عالمی دنیا اور انسانی حقوق کی تنظیمیں اس کا نوٹس لیں مودی حکومت حساس مذہبی
معاملات پر لوگوں میں نفرت پھیلا رہی ہے ۔ عالمی دنیا کا رواداری کے معیار باقی ممالک کے لیے الگ اور مودی کے لیے الگ نہیں ہوسکتا۔ بھارتی انتہا پسندی دنیا کے لیے ایک خطرہ بن چکی ہے۔ بی جے پی رہنمائوں کی صرف رکنیت معطل کرنا کافی نہیں،مودی سرکار کو دنیا کے تمام مسلمانوں سے باضابطہ معافی مانگنی چاہیے۔