مظفر آباد(صباح نیوز) حزب المجاہدین کے سربراہ اور متحدہ جہاد کونسل کے چیرمین سید صلاح الدین نے عظیم مجاہد و کمانڈر نثار احمد کھانڈے شہید کو خراج عقیدت پیش کرتے ہوئے کہا ہے کہ ان کی جدائی سے دل زخمی ہیں تاہم اللہ تعالی سے امید ہے کہ اِس عظیم مجاہد کا لہو ضائع نہیں ہوگا، شہدا کی یاد میں بلائی گئی ایک خصوصی تقریب سے خطاب کرتے ہوئے انہوں نے کہا کہ شہید نثار 25 برسوں سے حزب کے کارواں میں شامل تھے۔ کئی بار بھارتی فوج کے ہاتھوں گرفتار ہوئے لیکن جونہی رہا ہوتے تو فورا جہادی میدان کا رخ کرتے۔2018 سے میدانِ کارزار میں مسلسل برسر پیکار رہے ، مختلف زمہ داریوں پر فائز رہے۔ جمعہ کے روز کمانڈر نثار احمد کھانڈے بھارتی فوج کے ساتھ رشی پورہ کپرن اسلام آباد میں ایک خونریز جھڑپ میں شہید ہوئے ۔اِس مقابلے میں اطلاعات کے مطابق درجنوں بھارتی فورسز اہلکار زخمی اور ہلاک ہوئے۔