اسلام آباد(صباح نیوز)وفاق ، سندھ اور خیبرپختونخوا کا مفت پیٹرول کی کٹوتی کا اعلان۔ تفصیلات کے مطابق وزیراعظم شہباز شریف نے کابینہ کے اراکین کو فری پٹرول کی کٹوتی کا فیصلہ کرلیا ہے۔گزشتہ روز وفاقی حکومت کی جانب سے پٹرول کی قیمتوں میں 30روپے فی لٹر اضافے کے بعد وزیراعظم نے کفایت شعاری کے سخت اقدامات کا اعلان کردیا ہے۔شہباز شریف کی جانب سے کیے گئے اعلان کے مطابق کابینہ اراکین کو دیے جانے والے فری پٹرول میں کٹوتی کی جائے گی جبکہ کابینہ میں بھی کمی کا فیصلہ کیا گیا ہے۔خیال رہے کہ وزیراعظم نے یہ فیصلہ پڑولیم مصنوعات کی قیمتوں میں اضافے کے باعث کیا ہے۔وزیراعظم کو حکومتی سطح پر اخراجات کم کرنے کی تجویز بھجوا دی گئی ہے، سرکاری سطح پر فری پٹرول میں 30سے 40 فیصد کٹوتی کی تجویز دی گئی ہے، وزیراعظم آج خود معاشی ایمرجنسی سے متعلق اقدامات کا اعلان کریں گے جبکہ شہباز شریف کو پٹرول کے علاوہ بھی غیر ضروری اخراجات کم کرنے کی تجویز دی گئی ہے۔علاوہ ازیں وزیراعلی خیبرپختونخوا محمود خان نے عوامی مفاد میں احسن اقدام اٹھا لیا، تمام صوبائی محکموں اور اداروں کے پی اوایل اخراجات میں 35فیصد کمی کا فیصلہ کر لیا۔ وزیر اعلی خیبر پختونخوا محمود خان کے حکم پر سرکاری اداروں میں پیٹرول کی کٹوتی کے حوالے سے نوٹی فکیشن جاری کردیا گیا۔نوٹیفکیشن کے مطابق وزیراعلیٰ کے حکم کے تحت سرکاری اداروں میں افسران کے پیٹرول کا کوٹا 35 فیصد کم کردیا گیا ہے جس کا مقصد قومی خزانے پر بوجھ کو کم کرنا ہے۔ محکمہ خزانہ خیبرپختونخوا کے ترجمان کے مطابق سرکاری اعداد و شمار کے مطابق اس فیصلے کی روشنی میں صوبے کو ماہانہ ساڑھے 12 کروڑ کی بچت ہوگی جبکہ اس فیصلے سے صوبے کو سالانہ ڈیڑھ ارب روپے کی بچت ہوگی۔ واضح رہے کہ پی او ایل کی مد میں سالانہ ساڑھے 3 ارب روپے سرکاری محکموں میں خرچ ہوتے ہیں۔ اس کے علاوہ وزیراعلی سندھ سید مراد علی شاہ نے پٹرول کی کھپت کے حوالے سے اہم فیصلہ کر لیا، وزیراعلی سندھ نے پیٹرول کا 40 فیصد کوٹہ کم کرنے کے احکامات دے دیے۔مراد علی شاہ نے کہا ہے مجھ سمیت تمام وزرا، سندھ حکومت کے افسران کا پیٹرول کم کردیا ہے، 40 فیصد پیٹرول کوٹے کی کمی سے خزانہ پر بوجھ نہیں پڑے گا۔انہوں نے مزید کہا کہ پیٹرول مصنوعات کی قیمتیں بڑھی ہیں، پیٹرول کی بڑھتی قیمت کا بوجھ خزانے پر مزید نھیں پڑنا چاہیے، خزانے پر بوجھ کا مقصد عوام پر بوجھ ہے۔